Areces anuncia les infraestructures de tresporte como grandes protagonistes de la llexislatura

El presidente asturianu en funciones Vicente Álvarez Areces lleó ayeri'l so Discursu d'investidura, una intervención de más d'hora y media na que dio les principales llinies del so programa de gobiernu, que se centraron nes cuestiones d'empleu, con polítiques de formación ocupacional qu'iguaren el desfase ente ufierta y demanda de trabayu, la creación d'un modelu económicu basáu na productividá y el desarrollu del i+d+i, amás del cambéu del modelu de concertación social o la dignificación del trabayu a tirmpu parcial. La vivienda, siguiendo les actuaciones ya entamaes. La movilidá y la conectividá, cola entrada en serviciu del tren-tran y l'alta velocidá ferroviaria más l'ampliación del Aeropuertu d'Asturies van focalizar les grandes inversiones n'infraestructures de la llexislatura, mientres qu'una estratexa de cambéu climáticu ye la ufierta d'Areces pa la estaya de mediu ambiente, que va contar con conseyería propia nesta llexislatura, ello al empar que se comprometió una estratexa de desarrollu rural. Sicasí, la midida de más sonadía mediática de les qu'anunció ayeri Areces nel so discursu foi la de xubir les ayudes a la natalidá prometíes pol Gobiernu central de 2.500 a 3.000 euros.

Mientres dende los escaños socialistes el so representante Fernando Lastra allabó'l discursu d'Areces por falar "de l'Asturies real" y por asitiar l'empléu como exe principal, dende les files del PP Ovidio Sánchez calificó les palabres d'Areces de "previsibles" y xusto lo contrario, de tar poco apegaes a la realidá asturiana por facer "un discursu grandón cuando Asturies va la última en tolos indicadores". Sicasí, el líder popular anunció que la so formación va tener una gran sintonía colos socialistes cuando llegue'l momentu de tratar la reforma del estatutu d'Autonomía, cuestión na qu'albidró "alcuerdos amplísimos".

Pela so parte,el coordinador d'IX, Jesús Iglesias, echó pel discursu de Vicente Álvarez Areces na sesión d'investidura del Presidente asturianu na Xunta Xeneral. Pa Iglesias, Areces tuvo "poco seguru" y llamó-y l'atención a que falare delles vegaes de "voluntá de negociación" dempués de que franciere negociaciones cola so formación pa facer gobiernu. Afondando más nel conteníu del discursu, Iglesias alvirtió que les propuestes y ufiertes que fexo Areces nel so discursu tuvieron mui perbaxo de les que se llegare a alcordar nes negociaciones conxuntes enantes de qu'estes frayaren