Areces afirma que la TV autonómica “promueve la llingua asturiana” y que “batió rexistros d’audiencia”

El presidente asturianu asistió ayeri a la presentación del Sistema Integráu Multimedia de Radiotelevisión del Ente Públicu de Comunicación, matriz de la canal autonómica de TV. Nel actu, que se celebró 12 meses dempués de la primer emisión en prebes de la RTPA, el xefe del executivu asturianu defendió'l calter del Ente como una iniciativa "plenamente asturiana, con vocación de serviciu públicu y integrada dafechu na sociedá". P'Areces, la RTPA ye "una ferramienta válida pa vertebrar Asturies y francer cola idea d'una Comunidá Autónoma con velocidaes distintes".

El Presidente asturianu defendió que la TV autonómica cuenta con "unos niveles d'aceptación social mui elevaos" y, contra los datos apurríos por Sofres que-y dan a l'autonómica asturiana audiencies medies pa estos últimos díes na banda del 1,7 al 3,5%, Areces aseguró que los productos televisivos de la TPA "batieron rexistros d'audiencia incluso estatales" emponderando especialmente a "unos informativos que cada día crecen más en públicu". El Presidente definió la programación de la TPA como "con conteníos pa tolos gustos" y aseguró que l'autonómica, que namás tien dellos programes n'asturianu na so emisora de radio, tando la llingua cuasimente ausente nes emisiones de TV, "promueve l'usu y la difusión de la llingua asturiana", negándo-y asina la mayor a la crítica de bien d'organizaciones asturianistes que lleven protagonizando campañes y actos contra la probe presencia del asturianu n'autonómica dende'l mesmu entamu del proyectu del Ente.

L'asturianidá de la TPA garra p'Areces otra dimensión más en cuantes que "más del 84% de lo que s'emite refierse a Asturies y más del 64% faise en directo, ensin rodeos o arreglos". El presidente nun aforró n'allabancies a la independencia y oxetividá del mediu, afirmando que "los que nun creyeron nesti proyectu, que, por cierto, tamién salen a diariu nes sos imáxenes, saben que la pluralidá ye un valor d'esta cadena".

Nel so discursu, Areces tamién fizo referencia a que "col presupuestu más austeru de toles televisiones autonómiques armose un proyectu que xenera empléu estable y de calidá" y con una plantiya "con capacidá pa competir nos mercaos audiovisuales más esixentes del mundu".

Nun ye posible tener reacciones inmediates a les palabres d'Areces de los sos socios de Gobiernu, en cuantes que'l Conseyeru de Xusticia, Javier Valledor, que taba convidáu a participar nel mesmu actu de la TPA, emitió una nota de prensa refugando'l convite. La nota afirma qu'asina'l conseyeru quier "espresar la so distancia y la de la so fuerza política col actual modelu de televisión pública que desarrollen los xestores de la mesma". "Son conocíes les mios fondes diferencies coles actitúes y los criterios que tán impulsando nel Ente Públicu de Comunicación los sos directivos" esplicó Valledor que, de cualquier manera, emponderó'l llabor de los profesionales de la RTPA "pol gran llabor que lleven alantre".