Areces: “Los equipamientos culturales son de primer nivel”

El presidente d'Asturies, Vicente Álvarez Areces, punxo en valor los equipamientos culturales asturianos y señaló que dende l'Executivu integróse lo cultural con otres polítiques que-y dan puxu a la cultura.

P’Areces, dalgunos exemplos d’esta mestura ente cultura y otres polítiques son la meyora de les comunicaciones, l'apueste poles nueves tecnoloxíes, la conservación del mediuambiente, l'altu nivel de la educación y unos servicios públicos que puxen pola cultura.

Na inauguración de la esposición "Pasaxes. Viaxes pel Hiper-Espaciu", que se ta celebrando nel Centru d'Arte y Creación Industrial de Llaboral (Xixón), Areces dixo que’l so Gobiernu invirtió n'equipamientos culturales "de primer nivel", como esti Llaboral Centru d'Arte y Creación Industrial.
  
Destacó tamién que nel contestu de crisis económica ta en marcha l'ampliación del Muséu de Bellu Artes d'Asturies, col fin de facilitar una esposición más completa, y que ta a puntu de rematar la construcción del Centru Cultural Internacional Oscar Niemeyer. Y coles mesmes, acabada la obra civil, señaló que se va inaugurar el Centru de Pedrete Bustillo como iconu del arte rupestre.
 
“Propia personalidá”
"Cuatro grandes centros culturales que tienen la so propia personalidá, pero que coinciden non yá pola gran proyección de les sos colecciones y les sos actividaes; tamién pola so accesibilidá, que garantiza l'esfrute de los proyectos culturales d'estos centros por gran variedá de públicos", comentó Areces.