Arcu Lliterariu va dedicar la xornada a la normalización llingüística

Na carpa Espaciu Pallabres d'El Muelle. El sábadu va celebrase la Xeremandía y, el domingu, la entrega de los Premios Timón.

L'actividá n'Arcu Lliterariu nun apara y esti vienres tien programaes delles actividaes que nesta xornada van tar dedicaes a la normalización llinguística. La presentación de la espublización 'Xixón una ciudá abierta al mar', destinada como complementu pa los escolinos y escolines que faen un percorríu mientres el cursu per Cimavilla, va abrir a les 17.30 hores la cita. Editada pola Oficina de Normalización Llingüística de Xixón, los sos autores son Mercedes Calzada, Xurde Fernández Fernández y María Ángeles García Rodríguez, que van ta presentes nel actu xunto cola conceyala Ana Montserrat López Moro y la responsable del organismu municipal, María Xosé Rodríguez.

A les 18 hores, mentes, va principiar la parte dedicada a la normalización cola intervención de Ramón d'Andrés, que va poner una conferencia sobre delles cuestiones básiques sobre'l debate llingüísticu n'Asturies. Darréu, Fernando de la Fuente, direutor d'Asturies.com, va intervenir como representante de l'Asociación Cultural Ástura nuna presentación d'actividaes xunto con Carlos Pulgar, voceru nacional de la Xunta pola Defensa de la Llingua Asturiana, y Inaciu Galán, presidente d'Iniciativa pol Asturianu.

Por último, va tener llugar un alderique sobre la normalización llingüística nel que ta confirmada la participación de Mario del Fueyo, conceyal y voceru del grupu municipal de Xíxón Sí Puede; Manuel Couto, representante del grupu municipal d'Izquierda Xunida; Pablo González, conceyal del Partido Popular; y Humberto Gonzali, escritor y promotor cultural.

Presentaciones y Premios Timón

La xornada va finar cola presentación del llibros infantiles 'Caricote' de Carla Menéndez Fernández, de magar les 20 hores, y, darréu, de 'Nun-yos tengas perceguera 2', de Sidoro Villa Costales. Mentes, mañana al meudía, va celebrase la yá tradicional Xeremandía nel patiu del Muséu Casa Natal de Xovellanos, cola llectura de poesía n'asturianu, mirandés, gallegu y castellanu, pa depués, yá de tarde, dedicar la xornada n'El Muelle a la lliteratura mirandesa y gallega.

Arcu Lliterariu va poner el ramu'l domingu, xornada última del Festival Arcu Atlánticu, cola entrega de los Premios Timón qu'entrega l'Asociación Cultural L'Arribada, entidá que se dedica a la programación lliteraria del certame. Va ser a les 13 hores nel Escenariu Atlánticu cola presencia de los trés gallardonaos: Esther García López, X Premiu Timón, p'autores n'asturianu y gallego-asturiano; Pilar Sánchez Vicente, VII Premio Timón, p'autores asturianos en castellanu; y Ramón d'Andrés, IV Premiu Timón de Cultura Asturiana.