ArcelorMittal nun inclúi a Asturies na so llista de desinversiones pa mercar a la italiana ILVA

Nenguna planta asturiana ta na llista de desinversiones d’ArcelorMittal presentada pol xigante siderúrxicu a la Comisión Europea pa proceder a la merca de la italiana ILVA. El tren de chapa de Xixón considerábase como una de les posibles concesiones.

Asturies llibra asina d’esta operación cola que la mayor siderurxa mundial pretende consiguir el preste de les autoridaes antimonopoliu europees pa facese con ILVA, la más potente d’Italia. ArcerlorMittal propón vender los activos de la única planta de producción d’aceru galvanizáu de la compañía nel país transalpín, asitiada en Piombino; la factoría de Galați (Rumanía); la de Skopje (Macedonia); la d’Ostrava (República Checa); la de Dudelange (Luxemburgu); y, en Bélxica, les llinies de galvanizáu por inmersión en caliente 4 y 5 en Flémåle, y les instalaciones de llaminación en caliente, decapáu, llaminación en frío y lata en Tileu.

“Toda venta ta subordinada a la efeutiva conclusión de l’alquisición d’ILVA por parte d’ArcelorMittal. Prevése que la CE adopte una decisión final a esti respeuto non más tarde del 23 de mayu de 2018”, esplica la compañía nun comunicáu. Esta decisión supón un aliendu pa los trabayadores del tren de chapa de Xixón, yá qu’esta planta taba ente les posibles que podía poner sobre la mesa la siderurxa, sobre manera pola competitividá d’ILVA nesti sector.