Arcelor-Mittal decide zarrar de manera indefinida la llinia de pintura de la factoría d'Avilés

Tres anunciar que va prescindir de 200 emplegaos en Xixón, Arcelor-Mittal comunicó esti llunes a los sindicatos la so decisión de parar la llinia de pintura d’Avilés. Los cerca de 30 trabayadores van ser recolocaos n’otros puestos de la factoría.

Según señalaron fontes sindicales, la direición de la empresa toma esta decisión pola “baxa situación de cartera”.  Los sindicatos recuerden qu’hai dos años tamién se zarró la llinia de pintura avilesina per 14 meses y creen que nel momentu nel que se recuperen los pidíos, ésta tornará a funcionar, dao que se trata d’una de les instalaciones más modernes de la compañía.

Esta noticia llega depués de qu’Arcelor-Mittal anunciara la selmana pasada una mengua de más d’un 25 por cientu na so plantiya de llargos de la factoría de Xixón, pola que la empresa va prescindir de 200 emplegaos mediante recolocaciones y xubilaciones.