Araz Net recibió’l Premiu Andrés Solar 2006

Nun actu qu'enllenó'l salón d'Actos del Antiguu Institutu Xovellanos de Xixón la Xunta Pola Defensa de la Llingua entregó los sos premios "Andrés Solar" colos que reconoz el llabor de les persones y instituciones que más fixeron al favor de la llingua asturiana. Fernando de la Fuente, xerente d'Araz Net, empresa matriz d'Asturies.com, recibió'l pegollu d'esta edición declarando'l so contentu porque se reconoza'l llabor pola normalización del asturianu como ún de los oxetivos de la empresa fundada en 1996.

Nes sos pallabres d'agradecimientu pol premiu, de la Fuente afirmó que "col nuestru trabayu simplemente pretendemos que la llingua vaya de la mano de los adelantos tecnolóxicos que l'arrodien" y declaró que "anque haya xente dimpuesto a mandar la nuestra llingua a un muséu abúltanos que nun lo van consiguir" una opinión qu'afitó "nos miles de visites d'Asturies.com, que nos dicen que'l nuestru trabayu diariu nun ye pa la galería nin un entretenimientu pa filólogos, siendo Asturies.com un mediu de comunicación onde los sos llectores quieren un futuru nel que podamos caltener les nuestres señes d'identidá".

Reconociendo que "los oxetivos que nos marcamos fai casi diez años podíen paecer utópicos" Fernando de la Fuente agradeció'l premiu en cuantes que "por venir de quien vien, diznos que tamos nel bon camín y ye un estímulu pa siguir trabayando día a día, con honestidá y profesionalidá y desarrollando nuevos proyectos onde l'asturianu seya protagonista".