Arantzazu Ortiz gana’l II Premiu d’Ensayu Emilio Trabanco

La obra ‘La sidra y la manzana asturiana. De la tradición al arte’, d’Arantzazu Ortiz, foi la ganadora del II Premiu d’Ensayu Emilio Trabanco. Esti galardón, entamáu pola revista La Sidra, premia les obres d’investigación inédites sobre la cultura sidrera.
 
El xuráu del concursu, formáu por David M. Rivas, como presidente, Inaciu Hevia Llavona, Antón Fernández, Antonio Martínez y Roberto González-Quevedo, falló ayeri en Xixón el ganador d’esti premiu que lleva’l nome del fundador del Llagar Trabanco. Nesta ocasión, Arantzazu Ortiz toma’l relevu de Fernán Gonzali Llechosa –ganador de la primer edición del premiu col ‘Diccionariu Sidreru’–, con una obra na que repasa la presencia de la sidra asturiana y la mazana na pintura. Asina, nesti trabayu va poder contemplase “una riestra d'artistes y trabayos venceyaos a la sidre nel so más ampliu contestu: cultivu, pañada, mayada, tabiernes, chigres, romeríes, gastronomía", esplica l’autora. La entrega del premiu, dotáu en 1.500 euros, va celebrase’l 25 de febreru, a les 11.30 hores, nes instalaciones que tien el Grupo Trabanco en Llavandera, empresa que collabora con La Sidra na organización del concursu.
 
Otra manera, los espertos que conformaron el xuráu tamién encamentaron la espublización del trabayu ‘Catálogo de Etiquetas de sidra’, de Miguel Angel García Otero, al consideralu mui interesante. Nesta edición segunda del premiu participaron un total d’ocho ensayos.