Aragón entama un programa pilotu pa facer l'aragonés llingua vehicular en delles materies d'Infantil

La Dirección Cheneral de Politica Lingüistica va a echar a andar nel segundu trimestre d'esti cursu un programa pilotu pa facer l'aragonés llingua vehicular en delles materies d'Infantil. Ésti va desendolcase nel Val d'Echo, Benás y Pandicosa.

La Universidat de Zaragoza collabora nesti proyeutu que lleva'l nome de la escritora Rosario Ustáriz y que tien como oxetivu "favorecer la utilización del aragonés (la variedad dialeutal propia de cada zona) nel ámbitu escolar" y "contribuyir a la so revitalización", afalando al so emplegu "por parte de los neños nes rellaciones ente iguales". D'igual forma, tamién buscar superar "la diglosia qu'anguaño afeuta a la comunidá llingüística aragonesfalante".  

La implementación del programa nes aules va facese mediante l'ayuda del Grupo de Investigación Educación para la Lectura, Literatura Infantil y Juvenil y Construcción de Identidades (ELLIJ), que s'encarga tamién d'ellaborar los materiales didáuticos qu'emplearán nes sos clases tanto los alumnos como'l profesoráu, adaptaos a cada nivel educativu. Na presentación del proyeutu, del que se benificiará más d'un centenar d'escolinos, José Ignacio López Susín, director cheral de Política Lingüística, recordó que l'aragonés ye una de las llingües europees más amenazaess y con mayor riesgu de desaniciu, y señaló que “pa que l'aragonés sobreviva ha d'entamase polos más mozos”.