Apruébase’l decretu que crea y regula la Rede de Normalización Llingüística

El Conseyu de Gobiernu aprobó esti vienres el decretu que crea y regula la Rede de Normalización Llingüística, que naz pa coordinar los proyeutos y actividaes de los Servicios de Normalización Llingüística del país. Va promover l'usu institucional de les llingües propies y ye’l pasu previu al establecimientu d’un futuru Consorciu de Política Llingüística.

La Rede defínese como un órganu colexáu, d'adhesión voluntaria, de participación institucional y d'impulsu, creáu pa coordinar proyectos, actividaes y actuaciones de los distintos servicios y empobináu a dinamizar l'usu de les llingües propies. El decretu que vio lluz verde güei, llueu de pasar per un periodu d’información pública, regula la composición, organización y competencies de la mesma.

La estructura de la Rede de Normalización Llingüística va articulase nun Conseyu de la Rede que va tener una presidencia y vicepresidencia que van ocupar, de manera respeutiva, les persones responsables de la conseyería y de la direición xeneral con competencies en materia de política llingüística, y un númberu ilimitáu de vocalíes que van contar con representantes de cada alministración pública o entidá que se xunte a la Rede. Nengún de los sos miembros van percibir retribución dalguna pola so participación.

El decretu tamién prevé la creación d'una Comisión Téunica formada por personal téunicu de los respeutivos SNL y de l'Alministración. A esti órganu va corresponde-y facer estudios, proyeutos, actividaes, programes, planes y propuestes en materia de política llingüística, pudiendo formar los grupos de trabayu que considere necesarios.

Dende la Conseyería de Cultura, Política Llingüística y Turismu impulsóse la regulación normativa de la Rede de Normalización Llingüística como pasu previu al establecimientu d'un futuru Consorciu de Política llingüística. Tamién queda prevista na redaición del decretu, de cara a un futuru, la incorporación d'aquelles entidaes privaes ensin ánimu d'arriquecimientu (cámares de comerciu, fundaciones, asociaciones empresariales, de consumidores, conseyos reguladores, etc.) que lo soliciten.

Asisten a más de la metá de la población

Dende va munchos años ta en funcionamientu una Rede de Normalización Llingüística nos Conceyos de manera non reglamentada como plataforma collaborativa de trabayu y comunicación interna ente'l personal téunicu de los servicios, y esti decretu da-y agora carta de naturaleza. Cuasi la metá de los conceyos asturianos cuenten nesti momentu con unidaes alministratives que s'ocupen de la normalización de les llingües, dando serviciu a más de la metá de la población del país.

Éstes son los del Cabu Peñes, Mieres, Llangréu, Ḷḷena, Cangas del Narcea, Samartín del Rei Aurelio, Corvera, Castrillón, Llanera, Grau-Candamu, Avilés, ‘Comarca de la Sidra’, A Veiga, Fundación Parque Histórico del Navia y Xixón. La Rede ta llamada a desendolcar un papel fundamental na regulación territorial de la política llingüística, na creación de servicios normalizadores nuevos, nel caltenimientu de los que yá tán funcionando y na coordinación y desenvolvimientu de l'actividá de toos ellos.

Ente les xeres de los SNL figuren l’asesoramientu a les alministraciones públiques, la planificación de cursos de llingua asturiana y gallego-asturiano, la collaboración en procesos seleutivos nos que s’evalúen conocimientos llingüísticos, velar pol cumplimientu de la llexislación nel so ámbitu de competencia y difundir una imaxe positiva de les llingües propies.

Na imaxe, xunta del Conseyu de Gobiernu d'esta mañana, cola conseyera de Cultura, Política Llingüística y Turismu, Berta Piñán, en primer términu. Semeya obra d'Armando Álvarez.