Apruébase la moción que pidía ayudes pa conservar horros y paneres, "patrimoniu representativu de Noreña y Asturies”

|
Panera de Guerrillero Fombella (Noreña) ampliada

Tolos grupos municipales, a esceición del Partido Popular (PP), sofitaron la moción presentada por Conceyu Abiertu por Noreña pa crear unes llinies d'ayuda pa la conservación de los horros y paneres del conceyu. “Ye un patrimoniu etnográficu representantivu de Noreña y Asturies”, defende l’edil Antonio Martínez Fernández.

El Plenu celebráu ayeri aprobó la propuesta de la candidatura de xunidá popular que demandaba subvenciones municipales "pa fomentar que se realicen trabayos de caltenimientu o reconstrucción", al empar "de facer un siguimientu del estáu d'horros y paneres pa, si ye necesario, riquir a la propiedá qu'atienda a la so deber de caltenimientu”. D’esta forma, Conceyu Abiertu por Noreña considera que se pue “frenar la degradación continuo y esmolecedor que sufren dellos elementos, asina como prevenir estes situaciones”.

L’equipu de gobiernu municipal vio con bonos güeyos la moción, al igual que’l PSOE y Izquierda Xunida (IX), anque estes dos formaciones duldaron de la capacidá d’IPÑ y Foro pa poner en marcha estes ayudes y facer un control de siguimientu correutu. Mentes, la edil del PP opúnxose acusando de “populistes” a Conceyu Abiertu por Noreña, fixo referencia la propuesta del so partíu na Xunta Xeneral pa flexibilizar y ampliar los usos autorizables d’horros y paneres pa evitar el so abandonu por parte de la propiedá, valtada por FSA, Podemos y IX, cola astención de Ciudadanos, y argumentó que la moción se presentó ensin falar colos dueños de los 37 elementos inventariaos nel conceyu pa conocer los sos deseos y necesidaes.

La intención de l’alcaldesa Amparo Antuña ye la de contar con un proyeutu de presupuestos, anguaño prorrogaos, ente ochobre y payares, y Conceyu Abiertu por Noreña espera qu’ésti cuente con una partida pa estes ayudes “mínima de 10.000 euros”. “Ye un patrimoniu etnográficu representantivu de Noreña y Asturies; un patrimoniu cultural con valor añadíu qu’hai que conservar al igual que'l llingüísticu o l’industrial”, destaca Martínez Fernández, qu’adelanta que va ser una de les esixencies de la so formación p’apoyar les cuentes.

D’igual forma, demanda que tanto dende’l Gobiernu como a nivel llocal haya ayudes pa la conservación de los horros y paneres de tol país, ensin escacer el deber de les propiedaes a caltener estos bienes arquiteutónicos u otros como palacios o torres, munchos d’ellos en condiciones llacerioses.

Na semeya, panera de Guerrillero Fombella (númberu 26, proteición parcial).

Contador Estadistiques