Aprobáu el plan urbanísticu de Sotu'l barcu

La selmana pasada, la Comisión d'Urbanismu y Ordenación del Territoriu d'Asturies (CUOTA) dio de pasu la normativa nueva pal conceyu de Sotu'l Barcu, qu'incluyíen facer una urbanización d'apartamentos con bloques d'hasta ocho pisos en primera llínia de la mar. Estos bloques acorripiaríen de pasu ún de los cañaverales más importantes del país nel qu'añeren delles especies de páxaros. L'asociación de vecinos "Ríu Nalón" fizo una campaña d'oposición a esti proyectu, que s'articulaba alredor delconveniu que tenía l'ayuntamientu con tres empreses de contrates pa facer los bloques, recoyendo grandes concesiones en metros d'edificación a cambeu de que les constructores faigan nel pueblu delles actuaciones menores como una pista de deportes y cedan dellos locales. Otramiente, la carretera qu'habría que facer nueva pa llegar a la urbanización nun pasaría pol pueblu, colo qu'esta crecería al marxe d'él. Contra esti proyectu l'asociación presentó un cartafueyu d'alegaciones que l'Ayuntamientu nun tuvo en cuenta, dexando en manes de la demarcación de Costes y de la CUOTA la última pallabra. El primer organismu yá vieno a da-yos la razón a l'asociación de vecinos, reconociendo que la parte d'El Charcu nun podía ser edificable y qu'amás en nengún casu podríen facese más de 5 pisos. La selmana pasada, l'organismu supremu en materia urbanística n'Asturies ratificó'l criteriu de costes, colo que, anque va habela, la espansión residencial de San Xuan de l'Arena va ser más contenía de lo que se contaba de mano, anque con más 1.300 viviendes previstes, nun dexa de ser un aumentu mui grande pa un conceyu como Sotu'l Barcu, que tien agora 4.249 habitantes, un númberu qu'espoxigaría esponencialmente cola construcción de los bloques nuevos, que, énte la falta de mecanismos del conceyu p'atraer población, queda claro que van ser de segunda residencia. Representantes de l'Asociación de Vecinos "Ríu Nalón" dixeron a Asturies.com que lo que ta cociéndose namás que ye un primer pasu, porque como yá-yos dixeron a ellos, depués d'estos vendrín más bloques de viviendes .