Aprobaos los topónimos de Morcín y Grandas de Salime

El Conseyu de Gobiernu del Principáu d'Asturies aprobó na so sesión d'ayeri xueves los decretos de recuperación toponímica correspondientes a los conceyos de Morcín y
Grandas de Salime. Con estos dos, son yá 22 los espedientes toponímicos aprobaos dende l'aniciu de la llexislatura, mientres qu'otros 12 alcuéntrense, según la nota oficial "n'avanzáu estáu de tramitación" y podríen pasar trámite enantes de que remate la llexislatura pal executivu asturianu.



L'aprobación d'estos topónimos supón la continuidá de la recuperación del procesu de normalización de los nomes de llugar tradicionales asturianos dempués del parón del añu 2006, en que namás s'aprobaron 4 espedientes. La Xunta de Toponimia, que sigue col so llabor, celebró esta selmana una reunión en Mieres pa tratar l'espediente d'esti conceyu, ún de los más poblaos d'Asturies qu'entovía quedaben n'axenda del organismu del Principáu.