Aprobáu’l tramu de llinia d’alta tensión ente Boimente y Pezós

El BOPA d’esti xueves recueye l’aprobación del tramu de llinia llétrica aérea a 400.000 voltios de doble circuitu ente Boimente y Pezós. La Coordinadora Ecoloxista llamenta que nun se tuvieran en cuenta les alegaciones presentaes.
 
“Esti tramu ta dientro de la llinea de La Corredoria a Boimente, por eso entendemos que Red Eléctrica vulnera’l marcu llegal al facer l’estudiu de namái un tramu de 61 quilómetros cuando debería facese ún de totalidá de la llinia qu’incluya subestaciones qu’acompañen el proyeutu”, como la de Pezós o Grau, señalen dende la Coordinadora, qu’entiende que “l’estudio d’impautu nun pue realizase fragmentáu porque supón una vulneración nidia de la normativa vixente d’evaluación prevista na Llei 9/2006 d’Evaluación de Planes y Programas, qu’obliga a facer l’estudiu del proyeutu enteru, de manera global”. Según espliquen los ecoloxistes, d’esta forma Red Eléctrica Española consigue menguar l’impactu a la hora d’aprobar el proyeutu, amás de la oposición a la construcción de la llinia d’alta tensión al nun tener tanta repercusión.
 
Esta llinia d’alta tensión ente Lugo y Asturies va pasar polos términos municipales de Viveiro, Ourol, O Valadouro, Foz, Alfoz, Lourenzá, Barreiros, Riotorto, A Pontenova, A Fonsagrada, Santalla d’Ozcos, Samartín d’Ozcos, Grandas de Salime y Pezós, y tien como oxetivu “facilitar la evacuación de tresporte de la xeneración que se produz nes rexones escedentaries: Galicia y Asturies, favoreciendo al mesmu tiempu, la implantación de nueva xeneración de tipu renovable, de manera principal eólica”, reza’l Boletín Oficial del Principáu d’Asturies (BOPA) de güei. La Coordidora Ecoloxista, pelo sa parte, nun ve necesaria la construcción d’esta llinia d’alta tensión y recuerda l’impautu medioambienta altu d’esta instalación y los efeutos negativos que va tener en “rellación al turismu y los valores culturales de la zona”. Según apunten los ecoloxistes, l’impautu en dalgunos llugares, como na zona del ríu Agüeria y Santalla d’Ozcos, “debe calificase como severu o críticu en rellación a la vexetación y el paisaxe”.
 
Por esti motivu, les consecuencies pa la salú del ser humanu que tienen les llinies d’alta tensión que, amás, “carecen de sentíu n’Asturies”, y el refugu de los vecinos de la zona, la Coordinadora Ecoloxista d’Asturies asegura que va agotar toles víes llegales pa impedir la so construcción.