Apoyu a la oficialidá na Xunta Xeneral: de nengún diputáu nel 1987 a los 28 d'anguaño

|
Graficu de sofitu de la oficialidá na Xunta Xeneral

Xuan Xosé Sánchez Vicente foi'l primeru nel Parllamentu con Coalición Asturiana nel 1991.

La evolución del apoyu a la oficialidá de la llingua asturiana foi medrando d'una manera sele y progresiva dende esi añu, cuando la demanda entró na xunta xeneral gracies a la coalición eleutoral formada pol Partíu Asturianista (PAS) y Unidá Nacionalista Asturiana (UNA). Nes dos primeres eleiciones dende la constitución de la comunidá autonóma negún partíu que llevara nel so programa un sofitu espresu a la igualdá de derechos ente los falantes d'asturianu y castellanu n'Asturies algamara representación.

Nuna gráfica difundida güei por Iniciativa pol Asturianu pue comprobase la evolución d'esi sofitu gracies a la incorporación de la demanda por parte d'Izquierda Xunida (IX). Ésti llega al momentu más altu nel 2015, cola entrada de Podemos y Foro, anque ésti últimu siempre qu'hubiera un consensu al rodiu de la cuestión, representando xunto con IX a 17 de los 45 diputaos de la Xunta Xeneral.

La decisión del XXXII Congresu Autonómicu de la FSA-PSOE, na seronda del 2017, d'apoyar la oficialidá supunxo un reblagu pa la reivindicación. Una decisión de la militancia sofitada pola direición nueva encabezada por Adrián Barbón, anque refugada pola saliente, entovía nel Gobiernu, lo qu'impidió la reforma del Estatutu pa incluyir la oficialidá propuesta por Podemos y IX a pesar de contar con mayoría suficiente pa facelo.

La incorporación nel programa eleutoral socialista de la oficialidá nuna posición asemeyada a la de Foro, anque d'una manera más esplícita, nun restó votos a la FSA-PSOE, sinón tolo contrario, pasando de 14 diputaos a 20. Sumando los escaños algamaos por Podemos, Asturies pela Izquierda (IX-IAS) y Foro, anguaño sumen 28 favoratibles, la cifra más alta de la historia, 11 más que na llexislatura pasada y suficiente pa reformar l'Estatutu d'Autonomía al superar los trés quintos que marca la norma (27 diputaos) nel casu de llegar a un alcuerdu, anque ésti paez lloñe daes les postures amosaes hasta la fecha.

Contador Estadistiques