Apaez una pitón en Navia

Especialistes de la Coordinadora pal Estudiu y Protección de les Especies Marítimes atendieron esti sábadu en Navia una estraña llamada del puestu de la Guardia Civil qu'alvertía de l'apaición d'un reptil desconocíu nel puertu. El reptil resultó ser una pitón de cerca d'ochenta centímetros qu'apaeció muerta flotando en puertu, lo más fácil víctima d'una hipotermia, en cuantes qu'estes culiebres precisen de temperatures de 26º p'arriba. L'apaición d'esti animal en Navia, que guapamente pudo escapar de casa d'un particular, coincidió cola apaición d'otra pitón en Cataluña qu'entró pel váter d'un domiciliu particular dende casa'l vecín.


Cola apaición de la culiebra, el CEPESMA quixo facer público que la organización ta esmolecida pola entrada masivo en domicilios d'animales exóticos. Anque nun ve riesgu d'invasión pola inadaptación al mediu, Cepesma tien funcionando un programa de recoyida d'estos animales que yá lleva recoyíos entres selmanes ventisiete exemplares, ente ellos tortugues de Florida y esguiles del Xapón. Ente'l descontrol qu'hai con estos animales, el CEPESMA, solicitó que se redacte una normativa de control y un rexistru de pertenencia nel que se conseñen les altes y baxes d'estos animales