Añu 2011: “El gobiernu del PP en Xixón va ser ambiciosu col asturianu”

|
Entrevista web PP Pilar Fernández Pardo Les Noticies

Nes eleiciones del 2011 Foro foi, igual qu’agora, la segunda fuercia más votada en Xixón depués del PSOE, pero col apoyu del PP Carmen Moriyón quitaba a los socialistes l’Alcaldía per primer vez en Democracia. Enantes de la cita eleutoral, la candidata popular, Pilar Fernández Pardo, númberu 2 en 2023 na llista de Diego Canga a la Xunta Xeneral, declaraba que “el gobiernu del PP en Xixón va ser ambiciosu col asturianu; tamos a favor de la normalización”.

La daquella presidenta del PP xixonés fa´cía esta afirmación nuna entrevista a Iván G. Fernández pal selmanariu ‘Les Noticies’ qu’entovía ta disponible pa la so consulta –en parte– na web del partíu.

“Nuna entrevista que concedía a una canal de televisión usté pidía la oficialidá de la llingua asturiana. ¿Sigue pensando lo mesmo?”, entrugaba’l periodista, a lo que Fernández Pardo respondía que “lo que sí-y pue dicir ye que’l Gobiernu del PP de Xixón va ser ambiciosu cola llingua asturiana porque tamos arguyosos de la nuestra cultura y eso ye importante. Nosotros apoyamos el Plan pa la Normalización Social de la Llingua Asturiana, la Ordenanza de la Llingua nel Conceyu. Y, amás, tengo que recordar que nel añu 2009 presentemos un plan que yera más ambiciosu de lo qu’hai agora. Daquella presentemos un documentu con 108 inicitatives y actividaes, que depués quedaren reducíes a 52 cola aprobación del equipu de Gobiernu. Por eso digo que queremos ser más ambiciosos nesti ámbitu. Tamos a favor de la normalización social, pero nunca de la imposición, siempre con respetu a quien quiera facer usu dende l’Alministración”.

Nun ganaría les eleiciones, pero aquel 2011 hebo mayoría de la derecha, como esti 28-M. El PSOE de Santiago Martínez Árgüelles resultó’l más votáu, algamando 10 ediles, mentes que Moriyón llevaba 9 y el PP 5, suficiente pa los 14 que dan la mayoría; IX-Los Verdes quedaben con 3.

L’apoyu de Fernández Pardo a Moriyón, magar la orde de la direición autonómica del partíu de non facelo, dio l’Alcaldía a Foro, pero los populares nun entraron nel gobiernu. La situación anguaño ye asemeyada, anque la suma de los conceyales de Foro (8) y PP (5) ye insuficiente, necesitando los votos de VOX (2) p’algamar la mayoría de la derecha qu’impida que gobierne la llista más votada, la del PSOE (9); Convocatoria por Xixón (IX-Más País-IAS) tien 2 y Podemos, 1.

Nes eleiciones del 28-M de 2023 la candidata popular a l’Alcaldía de Xixón foi la oru olímpica Ángela Pumariega, mentes que la daquella cabeza de llista popular acudió como númberu 2 de la llista del PP pola circunscripción central llueu de ser recuperada por Canga pa la primer llinia política.

El papel que va tener l'asturianu nel pautu ente PP y Foro ye desconocíu, anque estes dos fuercies necesiten los dos conceyales de la ultraderecha, radicalmente contrarios a la llingua asturiana, pa investir a Moriyón, polo que nun ta claro si les postures de los dos partíos pa col idioma van ser les mesmes que nel pasáu.

Contador Estadistiques