António Costa gana les eleiciones en Portugal

Los socialistes ameyoren resultaos, pero tendrán que reeditar alcuerdos.

António Costa va siguir como primer ministru de Portugal depués de ganar les eleiciones llexislatives celebraes ayeri nel país ibéricu. Col 98,98 por cientu escrutáu, el Partido Socialista sumó 106 diputaos (36,65 por cientu del total de votos) –21 más que nel 2015– de los 230 que conformen el Parllamentu, polo que nun llega a los 116 qu'afiten la mayoría absoluta.

El sistema portugués va permitir formar gobiernu en minoría a Costa, anque necesitará apoyos mientres la llexislatura. Nesi sen, nun taría obligáu a repetir el pautu col Bloco de Esquerda (BE) y el Coligação Democrática Unitária (PCP-PEV), como na actual, pudiendo escoyer sociu.

Sicasí, el presidente yá anunció la so intención de siguir mirando pa la izquierda. El BE sumó 19 escaños (9,67 por cientu) y la coalición de comunistes y verdes, 12 (6,46 por cientu), perdiendo 5.

El centroderechista Partido Social Democrata (PPD/PSD) foi la segunda fuercia más votada, sumando 77 diputaos (27,90 por cientu), 22 menos qu'hai cuatro años. Tamién algamen representación CDS–Partido Popular, con 5 (4,25 por cientu); Pessoas-Animais-Natureza, con 4 (3,28 por cientu); la ultraderechista Chega, con 1 (1,30 por cientu); Iniciativa Liberal, con 1 (1,29 por cientu); y l'ecosocialista LIVRE (1,09 por cientu).

Na semeya, Costa celebra la victoria eleutoral.