Antón García y Vicente García Oliva vense colos sos llectores

Los alcuentros van tener llugar en Villaviciosa y Noreña, de manera respeutiva.

Los Talleres de Llectura n'Asturianu de Villaviciosa, entamaos pol Serviciu de Normalización Llingüística de la 'Comarca de la Sidra', entamen una sesión col escritor Antón García. Ésta va tener llugar el xueves, a les 19 hores nel aula del segundu pisu del Centru Culturar Capistrano, y va centrase nel llibru 'El viaxe', co qu'algamara'l VII Premiu Xosefa Xovellanos de novela, correspondiente al añu 1986.

Pela so parte, Vicente García Oliva tamién va vese colos sos llectores, nesti casu colos los más mozos. Va participar nun alcuentru previstu tamién pal xueves, a les 17 hores na Biblioteca Pública Municipal 'Alonso Marcos de Llanes' de Noreña, nuna actividá que s'entama con motivu del Día Internacional de la Llingua Materna que se conmemoró'l pasáu 21 de febreru.

L'escritor xixonés va falar de dalgunos de los sos títulos más conocíos ente la reciella, como 'Etenko y los patines maraviosos' o la so creación última 'Páxines del diariu de Simón'. Destináu a neñes y neños d'ente 5 a 9 años, los interesaos han d'apuntase hasta'l miércoles na propia biblioteca n'horariu de 10 a 10.30 y de 17 a 21 hores al tar les places llendaes a 15.