Antón García presenta "La mirada Aliella"

La sede del Atenéu Obreru de Xixón, asitiada na Cai Cuadonga de Xixón va acoyer esti martes 18 d'avientu, dende les 20:00 hores, la presentación del llibru "La mirada aliella" volume qu'axunta la poesía escrito ente 1981 y el 2006 pol escritor Antón García. El mesmu Atenéu ye quien edita esta obra dientro de la so colección "Tiempu de cristal". El profesor de lliteratura de la Universidá d'Uviéu Leopoldo Sánchez Torre va ser l'encargáu de facer la presentación del autor.

Antón García, fundador de la casa Ediciones Trabe, sellu qu'abandonó va pocos meses, tien una obra bien abundante lo mesmo na poesía que nel ensayu o la narrativa. Por exemplu, la so novela Díes de muncho (1998, premiu Xosefa Xovellanos) lleva yá trés ediciones y una traducción al español. Otru de los sos trabayos más conocíos ye'l volume Lliteratura asturiana nel tiempu (1994) nel que fexo una historia de la lliteratura. Antón García asoleyó va poco Xeneraciones & dexeneraciones,un primer volume recopilatoriu de los sos escritos sobre lliteratura asturiana . Como traductor, tien vertíes al asturianu obres de Clarice Lispector, Álvaro Cunqueiro, Federico García Lorca y dellos poetes más gallegos, catalanes, brasileños o ingleses. Como poeta publicó los llibros Estoiru (1984), Los díes repetíos (1989) y Venti poemes (1998, premiu Teodoro Cuesta), que son los que valieron de materia prima pal llibru que se presenta agora.