Antón García gana'l XXI Xuan María Acebal

Lleva'l gallardón col poemariu 'Ferralla'.

El xuráu encargáu de valorar les ocho obres finalistes tuvo presidíu pol director xeneral de Planificación Llingüística y Normalización, Fernando Padilla, y polos escritores Pablo X. Suárez, Elías Veiga, Esther Prieto y Ángeles Carbajal, amás de pol filólogu Xosé Miguel Suárez 'Tapia', que decidieron conceder por mayoría el gallardón al poemariu 'Ferralla' presentáu baxo'l nomatu de 'La Vieya Zuna' por "trátase un tópicu poéticu como’l de la muerte usando una estructura orixinal, de gran fuercia espresiva y con referencies cultes y populares perfectamente engarzaes".

Tres abrir la pica'l ganador resultó ser Antón García (Tuña, 1960), llicenciáu en Filoloxía Española pola Universidá d’Uviéu, escritor de gran trayeutoria y un destacáu editor, siendo'l fundador de Trabe, ente otres iniciatives. L'añu pasáu llevó'l XXXV Premiu Xosefa Xovellanos de novela con 'Crónica de la lluz y la solombra'.

El XXI Premiu Xuan María Acebal de poesía ye'l tercer de los cincos Premios Lliterarios de la Conseyería d'Eduación y Cultural que se falla. Enantes Ruma Barbero algamó'l VII Premiu Alfonso Iglesias de cómic por 'El viaxe a la lluz' y Vicente García Oliva'l VIII Premiu María Xosefa Canellada de lliteratura infantil y xuvenil con ‘Fontenebrosa III: el final’. Tolos gallardones tienen un recompensa de 3.000 euros.