Antón García anuncia aconceyamientos nuevos col sector editorial

"Queremos que les ayudes ayuden; entrugar qué necesidaes tienen y ver qué más se pue facer", esplicó'l direutor de Política Llingüística.

La presentación del llibru 'L'home les caparines', de Blanca Fernández, ayeri en Xixón desendolcó un interesante alderique sobre delles cuestiones, centraes sobre manera nos escritores más xóvenes, ente elles los premios lliterarios y el papel de les subvenciones a la edición. "Penaliza munches veces a los autores mozos", opinó Bardio, responsable d'Ediciones Radagast.

Al final del actu, Antón García pidió la pallabra pa dar les gracies "a Blanca por esti trabayu y el compromisu que tien cola llingua", amás d'a Galán pol entamu de la presentación y a Bardio "pol trabayu editorial", y pa confirmar que l'asuntu de les subvenciones a llibros "ye una preocupación constante y seria " na conseyería de Cultura, Política Llingüística y Turismu. "Queremos que les ayudes ayuden", espresó.

"Cuando llegamos a la conseyería lo primero que fiximos foi aconceyar col sector editorial y los llibreros pa entruga-y que necesidaes teníen", siguió, un asuntu que pretende retomar una vegada pasáu'l paréntesis que foi la pandemia. Asina'l direutor xeneral de Política Llingüística avanzó aconceyamientos nuevos, "yá cola esperiencia que tenemos de xestión, pa ver qué se pue facer coles ayudes; qué más que se pue facer pa qu'ayuden".

Darréu dixo nun coincidir en que les subvenciones perxudiquen a la mocedá, "y si fora asina, habría de correxise lo primero". Otra manera, esplicó la importancia de la presentación del proyeutu, el cuidáu na escritura y l'ausencia de faltes ortográfiques, a la hora d'algamar una bona valoración de la comisión encargada.