Antón García y Esther Prieto recordaron en Blimea los 21 años de trayeutoria d’Ediciones Trabe

El fundador d’Ediciones Trabe, Antón García, y la codireutora de la editorial anguaño, Esther Prieto, protagonizaron esti miércoles un actu na Casona del Bravial. Nél repasaron la trayeutoria de la empresa uviedina nos sos 21 años de vida.

El que fora direutor de Trabe hasta 2007 recordó na so intervención el primer llibru qu’espublizó, ‘Ventiún poemes’ de Pepín de Pría, y fixo referencia a otros títulos importante na historia de la editorial, como la torna al asturianu de ‘La odisea’, d’Homero, fecha por Xosé Gago, o’l diccionariu d’asturianu de Xuan Xosé Sánchez Vicente. Pela so parte, Prieto, direutora de la empresa xunto con Samuel Castro dende ochobre, centróse más nos llibros editaos nos años últimos, como la traducción al asturianu de ‘Harry Potter y la piedra filosofal’, ente otros. Amás, tanto García como Prieto recordaron anéudotes d’estos años y punxeron de manifiestu les dificultaes que tien el mercáu editorial anguaño.

Gema Suárez Torre, conceyala de Cultura de Samartín del Rei Aurelio, y Hugo Cortina, responsable de la Oficina de Normalización Llingüística, acompañaron a dambos nesti actu, que sirvió de pieslle a una muestra dedicada a Trabe por motivu de los sos 21 años de vida. Como xestu, la editorial regaló dellos llibros ente’l públicu presente na Casona del Bravial de Blimea.

Na semeya, Suárez Torre, García, Prieto y Cortina.