Anonymous AST anicia la so actividá con un documentu audiovisual sobre la toponimia de Carreño

El coleutivu Anonymous AST espublizó esti martes na rede un documentu audiovisual pa demostrar que los topónimos recoyidos pola Xunta Asesora son los tradicionales del conceyu de Carreño. Ésta ye la so primer aición.
 
“Ante la falta de rigurosidá nes noticies espardies por dellos elementos sociales nel Conceyu de Carreño rellacionaes cola toponimia tradicional, el coleutivu Anonymous AST asoleya un documentu audiovisual nel que se demuestra d'una manera nítida, atayante ya incuestionable que los topónimos recoyíos pol equipu asesor y oficializada nel BOPA del 6 de mayu del 2005, son los topónimos tradicionales”, espliquen nun comunicáu. Na pieza audiovisual, de cinco minutos de duración, el coleutivu Anonymous AST amuesa al traviés d'unes videu-imaxes a les que tuvo accesu, el llabor de trabayu de campu fechu nel llugar pol profesor Álvarez-Balbuena xunto con Ramsés Ilesies Fernández y Xosé Antón Fernández ‘Ambás’ ente finales del añu 2010 y primeros del 2011. D’esta forma, pue comprobase como homes y muyeres de Carreño reconocen topónimos como Quimarán, Prevera, Llorgozana, Priendes o El Pielero, como los que sintieron tola vida.
 
“Anonymous AST quier, al traviés de les sos aiciones, y al traviés d'esti vidéu en particular, llantar cara d'una forma atayante a aquellos elementos distorsionadores que pretenden callar la voz del pueblu, la voz de la xente, la voz popular”, anuncien dende’l coleutivu.