Andecha recuerda con un homenaxe la declaración de soberanía del Conseyu d’Asturies y Lleón

Tuvo llugar en Xixón el 24 d’agostu del 1937. L’actu va celebrase esti sábadu énte’l monolitu conmemorativu instaláu nel puertu Tarna.

Esi 24 d’agostu roblóse'l decretu pol que Conseyu Interprovincial d'Asturies y Lleón convirtíase nuna institución soberana presidida por Belarmino Tomás, que resistiría hasta'l 21 d'ochobre, día nel que les tropes nacionales entraron en Xixón. Un pasu alantre dau pol pueblu asturianu en plenu conflictu bélicu qu’Andecha Astur nun quier que quede nel escaezu pese al pasotismu de les instituciones asturianes.

Por eso, 78 años depués, militantes de la formaciones nacionalista y ciudadanos van acudir al monolitu del puertu Tarna pa reivindicar esa fecha y fechu históricu, “dientru d'una dinámica de recuperanza de la nuesa soberanía comu pueblu, y per ende, del nuesu derechu a decidir llibre y democráticamente'l nuesu futuru ensin más llendes que les que voluntariamente querramos ponemos”. L’actu va celebrase a les 13 hores del sábadu.

“Andecha Astur fai un llamamientu al conxuntu de la sociedá asturiana a recuperar aquellos valores que llevaron al pueblu asturianu a asumir les riendes del so propiu destín, y lo mesmo que fixeron los nuesos antepasaos, a enfotase en sofitar y costruyir alternatives propies empobinaes a algamar la recostruición nacional y social d'Asturies”, apunten dende la organización.