Andecha recordó la Revolución del 34

El cementeriu de Pando, llugar onde ta enterráu Belarmino Tomás, acoyó un añu más l’actu d’homenaxe d’Andecha Astur a la Revolución d’Ochobre del 34. D’esta manera la formación nacionalista opónse a la celebración del ‘Día de la Hispanidad’.

“Andecha Astur fai reconocencia de la heroica llucha del pueblu trabayador asturianu pola llibertá y el socialismu, torgada pola represión militar del Exércitu español, primero de la República y llueu del franquismu, llucha que se personifica na figura de Belarmino Tomás, permitiendo que l’homenaxe d’esti llunes seya de fechu un homenaxe al conxuntu del pueblu trabayador asturianu”, rezaba la convocatoria de la organización, qu’axuntó ayeri a militantes y simpatizantes nel cementeriu asitiáu en La Felguera. L’homenaxe celebróse énte la tumba del dirixente obreru, que trés años depués presidiría’l Conseyu Soberanu d’Asturies y Lleón.

Na intervención política destacáronse “los paralelismos d’aquellos tiempos colos d’anguaño y cómo, salvando les llóxiques distancies, el camín del socialismu pasa pola definición d’Asturies comu marcu específicu de la llucha de clases y la refuga dafechu de cualisquier dependencia o sucursalismu español”, yá sía “de dereches o d’izquierdes”, al entender que tresmite “el mesmu mensaxe: la incapacidá d’Asturies pa decidir llibremente’l so futuru”.