Andecha propón una candidatura asturiana conxunta dientro de la coalición que lidera EH Bildu

Los partíos nacionalistes d’izquierdes principien a tomar posiciones de cara a les Europees de mayu. Conceyu celebra'l sábadu un conceyu pa tratar esti asuntu y Andecha propón una candidatura conxunta dientro de la coalición que lidera Bildu.

Según espliquen dende Andecha Astur, tovía pendiente de celebrar un Conceyu Xeneral sobre les Europees, la organización yá treslladó de forma oral al restu de fuercies nacionaliegues la posibilidá de continuar cola xunidá d’aición entamada esti añu, que tuvo reflexu nel primeru de mayu o nel Día de la Nación Asturiana, con una candidatura conxunta dientro de la coalición que lidera Euskal Herria Bildu y que sería una continuidá d’Iniciativa Internacionalista. Esta posibilidá supondría “un pasu perimportante pa espresar xunidá d’aición en términos eleutorales y conocer tanto la capacidá d’actuación como la respuesta social”.

Conceyu Abiertu va tratar ésta y otres opciones mañana nun Conceyu Nacional abiertu a tola ciudadanía previstu pa les 11.30 hores, en primer convocatoria, y pa les 11.45, en segunda, na sala d’aconceyamientos del depósitu d’agua antiguu de Noreña, na Plaza’l Rebollín. Les Europees del 25 de mayu va ser l’únicu puntu del orde de díi d’esti conceyu. Tres el mesmu, la plataforma d’eleutores va celebrar la so segunda xinta de xermandía, a la que tán convidaos tanto militantes como simpatizantes, que va tener llugar na sidrería El Güelu a les 15 hores,

Pela so parte, Compromisu por Asturies va tomar una decisión definitiva sobre la so postura de cara a les eleiciones al Parllamentu Européu tres les fiestes navidiegues. Dientro de la organización hubo un alderique nel que s’analizaron toles víes abiertes, dende participar na coalición d’EH Bildu o na que posiblemente lidere ERC, a acudir con otres fuercies asturianes o inclusive en solitariu.

Semeya del esterior de la sede del Parllamentu Européu en Strasbourg.