Andecha homenaxa al Conseyu Soberanu d'Asturies y Lleón

El monolitu del puertu Tarna conmemorativu de la declaración de soberanía del Conseyu Soberanu d'Asturies y Lleón acueye'l sábadu un actu d'homenaxe. Andecha Astur entama esti eventu.

El 24 d'agostu del 1937 roblóse'l decretu pol que Conseyu Interprovincial d'Asturies y Lleón convirtíase nuna institución soberana presidida por Belarmino Tomás, que resistiría hasta'l 21 d'ochobre, día nel que les tropes nacionales entraron en Xixón. Mañana, 77 años depués d'aquel momentu históricu, Andecha Astur quier homenaxar esti pasu alantre dau pol pueblu asturianu "qu'entamó un auténticu procesu revolucionariu y de reconocencia a nivel internacional que defendió heróicamente coles armes frente a un exércitu franquista y los sos alliaos alemanes". 

"Güei, cuando l'Estáu español continúa col procesu d'asimilacionismu y negación de la identidá nacional asturiana y de los nuesos derechos coleutivos, y cuando la izquierda española n'Asturies pretende garrar fuercia con proyeutos estatalistes importaos dende Madrid y nos qu'Asturies nun ye más qu'una sucursal ensin reconocencia de la so identidá nacional y soberanía, Andecha Astur fai un llamamientu al conxuntu de la sociedá asturiana a recuperar aquellos valores que llevaron al pueblu asturianu a asumir les riendes del so propiu destín y a lliberase de proyeutos españolistes que torguen la mesma sobrovivencia d'Asturies comu nación", apunta la organización nun comunicáu. Esti yá tradicional actu va tener llugar a les 13 hores.