Andecha Astur llama a un “procesu d’alderique que permita redefinir l'asturianismu de forma efeutiva”

|

Esti sábadu Andecha Astur celebró un aconceyamientu pa valorar los resultaos eleutorales del 24 de mayu.

La formación nacionalista cree necesario l’entamu d’un “procesu d’alderique abiertu a la participación de tol asturianismu que permita redefinilu de forma efeutiva”.

Con un cifra curtia de 990 votos (0,18 por cientu), 316 más que nel 2012 (0,13 por cientu), Andecha sacó como datu positivu “ la calidá d’un votu 100 por cien consciente y comprometíu”, asumiendo “la necesidá d’articular l’asturianismu políticu y de rentabilizar eleutoralmente la so capacidá d’incidencia social, lo que pasa pola convocatoria d’un Conceyu Nacional qu’afaye la llinia política a la rialidá d’anguañu y a los oxetivos plantegaos”. “Viose la necesidá d’entamar un procesu d’alderique abiertu a la participación de tol asturianismu que permita redefinilu de forma efeutiva, cola ellaboración d’una llinia política en común lo más afayao posible a la situación d’anguañu”, añade la organización liderada nestes eleiciones por Paulo Arboleya, qua tamién considera importante articular “una alternativa viable que seya ferramienta de cambiu pa la sociedá asturiana, en defensa de los nuesos drechos individuales y coleutivos, cola superación del marcu socio-económicu que tantu dañu ta faciendo a la sociedá asturiana y la redefinición del marcu xurídicu-políticu que supón la Costitución española y l’Estatutu d’autonomía impuestu que carecemos, siempres col derechu a decidir comu oxetivu irrenunciable”.

D’igual forma, calificó d’esmolecedor el panorama actual, “cola esapaición a efeutos práuticos del rexonalismu asturianista, y la integración de persones y organizaciones polítiques que se definíen comu nacionaliegues/soberanistes na sucursal n’Asturies de Podemos, quedando n’activo namás Andecha Astur”, anque sí valora como positivo’l “xiru a la izquierda de la sociedá asturiana nestes eleiciones, por más que seya al traviés de formaciones sucursalistes de Madrid, considerando que’l procesu de redefinición de la izquierda española al traviés de Podemos ye un procesu interesante en sigo mesmo, pero inasumible dafechu pa quien defendemos una Asturies ensin servilismos nin sucursalismos na que los asturianos/es seyamos los auténticos protagonistes de los cambios sociales que’l país necesita, y non marionetes de proyeutos estatalistes que pasen pola negación de la nuesa identidá nacional y el nuesu derechu a decidir, y a los que fasta-yos cuesta reconocer derechos tan básicos comu la oficialidá de la llingua asturiana”. Por último, destacó los resultados de Conceyu Abiertu por Noreña, que se convirtió na tercer fuercia con dos ediles, un trabayu desendolcáu nestos cuatro años que “marca una llinia d’actuación de la qu’estrayer conclusiones”.

Contador Estadistiques