Andecha considera “inaceptable” l’axudicación de la información llocal de la TPA a una empresa madrilana

VAV Compañía de Producciones, empresa asentada en Madrid, va encargase de la ellaboración de los conteníos llocales pa los informativos de la TPA. Andecha considera “inaceptable” esta axudicación y critica'l sucursalismu del Gobiernu.

Esta selmana conocióse la decisión de la Radio Televisión del Principáu d’Asturies (RTPA) d’axudicar a esta empresa, con sedes tamién en Mérida y Lisboa, la ellaboración de los conteníos llocales pa ‘TPA Noticias’ al presentar la ufierta más barata ente tolos aspirantes tres rebaxar en 100.000 euros la inicial de 846.870, una cantidá 4.500 euros inferior a la que fixera El Comercio Televisión. Esta convocatoria yera una novedá con respeuto a les anteriores, yá que la RTPA dio’l pasu de centralizar la información llocal nuna sola empresa en cuenta de dividir les concesiones per zones xeográfiques, como yera vezu, siendo les grandes perxudicaes les pequeñes productores asturianes que s’encargaben hasta’l momentu de cubrir les noticies d’Asturies.

Andecha Astur emitió un comunicáu criticando esta decisión, yá qu’entiende que “la subcontratación de los servicios d’información llocal de la RTPA en bloque a una empresa madrilana, por un presupuestu inferior en menos d’un 1 por cientu respeuto a l’alternativa asturiana más próxima no económico, y ensin tener en cuenta la llingua nin la cultura asturiana, nin siquier daqué tan básico como la conocencia del mediu y la vinculación del territoriu, aspeutos toos ellos esenciales a la hora realizar l’actividá contratada, supón un amenorgamientu de la calidá del serviciu y un mecanismu inxustificable pa favorecer les candidatures foriates frente a les nacionales”. La organización recuerda que l’ente públicu de comunicación incumple con esta decisión les “sos funciones de potenciación de la industria audiovisual asturiana y de los profesionales de los medios de comunicación asturianos, empeorando entá más si ye posible les espeutatives llaborales de los profesionales d’estos medios y les industries auxiliares de los mesmos, desviando un capital a Madrid qu’agora mesmo resulta indispensable p’Asturies”. D'igual forma, critica'l sucursalismu d'un Gobiernu "enfotáu en facer d’Asturies un barriu de Madrid".

Foro recurrirá la decisión

Foro Asturias Ciudadano solicitó l’espediente de contratación de la empresa VAV Compañía de Producciones cola intención d’estudiar la presentación d’un recursu a la decisión de la RTPA. El partíu de Francisco Álvarez-Cascos, que siempre se mostró favoratible a la privatización del ente públicu de comunicación, nun aprueba la estratexa d’esternalizar la información llocal de los servicios informativos.