Andecha Astur y Foro faen públicu l’informe de la OLAF sobre El Musel

|
La Direición Xeneral de Política Rexonal de la Comisión Europea nun aprobó’l modificáu de 250 millones d’El Musel. Ye una de les munches irregularidaes qu’apunta l’informe de la OLAF sobre les obres d’ampliación del puertu xixonés.
 
Andecha Astur y Foro recibieron ayeri’l tan demandáu documentu al Ministeriu de Facienda y, al momentu, colgáronlu nes sos respeutives páxines web. Esti informe, de 341 páxines, analiza la investigación de la Oficina Europea de Llucha contra’l Fraude (OLAF) de la Comisión Europea tres una denuncia puesta pola formación nacionalista’l 18 de marzu del 2009 al traviés de Mikel Irujo (Eusko Alkartasuna), eurodiputáu de la coalición Europa de los Pueblos –de la que formaba parte– por irregularidaes na execución del proyeutu d’ampliación d’El Musel. El mesmu esixe la devolución de 198 millones d’euros de les ayudes concedíes y yá recibíes, y refuga la entrega d’otros 49.500.000 euros reteníos por mor de l’apertura d’esta investigación.
 
Ente les munches irregularidaes que señala l’informe destaca que’l modificáu del proyeutu de 250 millones d’euros nun foi aprobáu pola Direición Xeneral de Política Rexonal de la Comisión Europea. Tamién diz nun entender que l’Autoridá Portuaria de Xixón aceptara pagar un costu mayor polos materiales, motivu principal d’esti aumentu del presupuestu pa les obres, y apunta que la empresa axudicataria, la Unión Temporal de Empresas Dique Torres, denegó l’accesu de la OLAF a los sos rexistros contables y documentos fiscales. D’igual forma, el documentu afirma que “los fechos constataos podríen ser constitutivos d’infracciones nel ámbitu penal conforme al Códigu Penal español”, polo qu’entiende que debe llegar “a l’Autoridá xudicial pa la so consideración”.
 
“Areces y Buendía tienen muncho que desplicar”
 
Tres facer públicu l’informe, la organización nacionalista señaló que, “como pue vese, tanto la denuncia como les valoraciones que vien faciendo Andecha Astur tán 100  por cien xustificaes”. Arriendes d’ello, considera que tres la obra d’El Musel “hai responsabilidaes llegales, pero sobre manera polítiques. Areces y Buendía tienen munchu que desplicar.”
 
Pela so parte, Isidro Martínez Oblanca, senador de Foro que tamién demandara'l documentu de la OLAF, apuntó que “lo asocedío n’El Musel ye un atropellu al presente y al futuru de los asturianos”, amás de “una vergoña pa España” que la oficina antifraude europea “interviniera énte la pasividá amosada mientres años poles instituciones que tienen la obligación de velar pol interés públicu”. El políticu xixonés añadió que “nuna llectura inicial, la documentación yá pon n’evidencia l’atropellu al interés públicu cometíu mientres les obres d’ampliación d’El Musel, que costará 250 millones d’euros a los ciudadanos; esto ye, más paru y más ruina p’Asturies”.
 
Semeya espublizada por Jon Iñarritu (Amaiur) en Twitter tres la so visita pa conocer El Musel realizada colos sos socios de coalición, Andecha Astur.
 
AdxuntuTamañu
PDF icon Informe de la OLAF sobre El Musel.pdf18.58 MB
Contador Estadistiques