Andecha Astur rexistra una propuesta na Xunta Xeneral pa la reconocencia oficial del 25 de mayu

Esti xueves, coincidiendo col 209 aniversariu de la declaración de soberanía de la Xunta Xeneral, Andecha Astur rexistró una propuesta pa la reconocencia oficial d’esta fecha “como espresión y reivindicación del drechu a decidir que mos correspuende como pueblu”. La organización celebra esti sábadu’l XX Día d’Andecha.

La propuesta presentada recueye concretamente’l pidimientu de que la Xunta Xeneral “asuma los fechos hestóricos y los conteníos políticos d’aquel 25 mayu de 1808, apruebe una resolución afitando que la soberanía reside nel pueblu Asturianu y oficialice la celebración istitucional d’esta fecha como espresión y reivindicación del drechu a decidir que mos correspuende como pueblu”. Con esta iniciativa, Andecha Astur reivindica una vegada más esta fecha hestórica y “sal al pasu de los que pretenden reivindicala como fecha alternativa al 8 Setiembre namás pol calter llaicu de la mesma, en comparanza col usu relixosu que se-y da al 8 setiembre dende’l ‘Principado’. Reivindicar el 25 Mayu escaeciendo que ye’l primer actu d’autodetermín d’Asturies na dómina contemporánea, y que nelli se reconoz espresamente que la soberanía reside nel pueblu asturianu ye polo menos tan grave como facer del aniciu del Reinu d’Asturies una festividá relixosa”.

Coincidiendo col 25 de mayu, la formación nacionalista entama un añu más el Día d’Andecha. Nesta ocasión va ser n’Uviéu, baxo’l lema ‘Un pueblu vivu, una Asturies llibre’, y va consistir nun actu na Sala Capitular de la Catedral d’Uviéu –onde tuvo llugar la declaración de soberanía– a les 13 hores, a la que va siguir una espicha na sede d’Andecha Astur.