Andecha Astur protesta contra'l peaxe del Güerna

'Peaxe non, ¡Ye un robu!' ye'l nome d'una campaña entamada pola formación nacionalista na propia autopista.

"Ye una infraestructura vital p’Asturies, única comunicación cola Meseta y, poro, principal pasu imprescindible pal comerciu esterior per tierra", asegura Andecha Astur, que denuncia que "yá Zapatero prometió lliberar el peaxe nel 2004, lliberación qu’eleición tres eleición el PSOE ufierta dientru’l so programa y qu’a la hora de la verdá escaez dafechu, dándose’l casu de que l’actual Gobiernu de Barbón pretende que mos conformemos con una cenciella rebaxa". Entiende qu'esti aisllamientu que provoca'l peaxe torga "al máximu cualisquier oportunidá de recuperación a tolos niveles" y fai "imposible’l desendolcu económicu" del país.

Por esi motivu, un piñu de militantes desplazóse esta fin de selmana hasta'l puntu de pagu de l'autopista con una pancarta y punxo cartelos y repartió pegadielles de denuncia d’esta situación en gasolineres y puntos de descansu, amás de nes pontes previes a la mesma en Ḷḷena. Esta campaña contra'l peaxe inxértase dientro d'otra más amplia en defensa de 'Futuru p'Asturies' y va contar con más aiciones.