Andecha Astur homenaxea la declaración de soberanía del Conseyu Soberanu

|
Andecha Astur homenaxea la declaración de soberanía del Conseyu Soberanu

Nel actu d’homenaxe a la Declaración de Soberanía del Conseyu d’Asturies y Llión destacaron la necesidá de recuperar la soberanía perdía como ferramienta imprescindible pa garantizar el futuru d’Asturies.

 Nel Puertu de Tarna, delantre del monumentu que fai alcordanza d’esta hestórica declaración tuvo llugar la ufrienda floral y la posterior intervención política a cargu de Mariano Suárez, que tres faer un repasu a les declaraciones de soberanía na historia d'Asturies y a la repercusión de la declaración de soberanía pol Conseyu Soberanu d’Asturies y Llión,  pasó aína a valorar la situación d’anguañu, con un “Principado y un estatutu impuestu dende Madrid y victimes de la política española de desindustrialización y esfarrapamientu del texíu socioeconómicu y cultural d’Asturies".

Na so intervención Mariano Suárez destacó "el rixu del nuesu pueblu y la viabilidá social y económica cola que cuntamos p’afitar el futuru colleutivu y el progresu social, a más de la necesidá de recuperar la soberanía que perdimos pola fuercia les armes, como ferramienta imprescindible p’avanzar nun proyeutu común que permita superar la situación que carecemos anguañu y garantizar la superviviencia como pueblu y avanzar haza una sociedá más xusta ya igualitaria".

Pa finar, perafitóse la reclamación de la República Asturiana como una "continuidá hestórica d’aquella declaración de 1937 y tamién y sobro too, como únicu sistema que garantiza la llibertá, democracia y progresu d’esti pueblu".

Semeya: Participantes nel actu nes casamates asitiaes en Tarna.

Contador Estadistiques