Andecha Astur esixe la reparación del órganu de la Catedral d’Uviéu

L'agrupación d'Uviéu del partíu Andecha Astur presentó un escritu énte la Conseyería de Cultura pidiendo-y qu'asuma la igua del órganu de La Corte de la Catedral d'Uviéu. Na so reclamación, Andecha pide que se faiga la reparación "enantes de que sía imposible la so recuperación técnica".

Andecha Astur diz que l'órganu lleva cuasimente trés años estropiáu de resultes del agua que-y entró cuando la Conseyería de Cultura entamó unes reparaciones en teyáu de la Catedral. L'agrupación uvieina d'AA camienta que la Conseyería actuó enquivocadamente dende un primer momentu, al nun pidí-y a la empresa contratista, causante direuta de la inutilización del órganu'l pagu integru de la restauración del instrumentu musical como dañu deriváu de la so neglixencia na obra; y asegura que'l dañu ta yendo a más col pasu del tiempu. La formación nacionalista asegura que se trata de "un instrumentu únicu n'Asturies" y que la Conseyería paez que nun tien "nengún enfotu real na so recuperación" apelando a la Llei de Patrimoniu pa que se proceda a la reparación.