Andecha Astur denuncia que la Xunta Eleutoral bloquió les sos papeletes por tar en llingua asturiana

Les papeletes al Congresu y al Senáu presentaes por Andecha Astur foron bloquiaes pola Xunta Eleutoral al tar n’asturianu. “Tien de decidir si’l fechu de presentales en llingua asturiana pue xustificar la so anulación”, señalen dende la organización.
 
La formación nacionalista defende que "vien calteniendo en toles eleiciones una coherencia llingüística que la llevara n'ocasiones a quedar fuera de les convocatories eleutorales pola utilización del asturianu, hasta que, a lo último, nel añu 2000, el Tribunal Costitucional español reconoció'l drechu a utilizar la llingua asturiana". "Dende entós non sólo presentare tola documentación en llingua asturiana dafechu, sinon que llogró validar les sos papeletes electorales tamién n'asturianu", espliquen dende Andecha Astur.
 
Sicasí, "l'anormalidá democrática que se carez n'Asturies, onde la nuesa llingua nacional continúa ensin reconocese de forma oficial, propicia situaciones como ésta, na que cabe la posibilidá de que se vulneren los nuesos llexítimos drechos a participar nestes eleiciones prohibiéndomos l'usu de la nuesa llingua y obligándomos a una nuea batalla llegal", continúa’l comunicáu del partíu soberanista. "Nel meyor de los casos, yá supunxo un importante prexuiciu pa la nuesa campaña eleutoral, darréu que la paralización del procesu de validación de les papeletes yá provocare serios problemes nel normal desendolcu de la nuesa campaña elleutoral, yá que complicará en gran midida que les nueses papeletes puedan llegar a tiempu a los eleutores", esplica la organización.