Andecha Astur denuncia illegalidaes nel derribu d'un palaciu del sieglu XVII en Noreña

L'agrupación de Noreña del Partíu Políticu Andecha Astur, que llamentare públicamente'l pasáu mes de febreru'l derribu na Cai Sorribes de Noreña d'una casona que databa del sieglu XVII, denuncia agora que la obra de derribu fízose ensin la resolución que diz que se precisa pa ello de la Conseyería de Cultura, teniéndose'l conceyu p'autorizar la obra nun informe favorable de la Comisión Permanente de Patrimoniu que, al paecer d'AA, nun tien valir llegal pa da-y el preste al derribu.

L'agrupación d'Andecha Astur de Noreña condena la perda d'esta pieza del patrimoniu asturianu, que diz que gozaba de protección llegal y aseguró nel so día que l'inmueble "figura a nome de Joaquín García Pumarino Ortea, que vien exerciendo d'arquitectu municipal" dalgo que p'Andecha Astur de Noreña abultaba raro enforma y polo que esixía "aclaraciones del gobiernu municipal", alvirtiendo que diba investigar les responsabilidaes que pudieren venir d'ello. Anque vien trabayando pa salvar la Casona de la cai Sorribes dende va yá 7 años, l'agrupación d'Andecha Astur de Noreña denuncia que les sos quexes, peticiones de d'actuación d'urxencia ente l'Ayuntamientu y de que l'Alcalde informare públicamente de la situación "nun tuvieron enxamás rempuesta nenguna y el gobiernu municipal nun fizo nada pa iguar esta bochornosa situación d'abandonu del patrimoniu".