Andecha Astur convoca un actu políticu n’Uviéu nel Día de la Nación Asturiana

El so lema pa esti día ye "Soberanía y Socialismu". Dempúes participaran na manifestación de Lluchando pola Soberanía.

Andecha Astur (AA) convoca pa esti 8 setiembre, Día de la Nación Asturiana, una concentración na Plaza la Catedral d’Uviéu a les 12:30 la mañana, ónde, tres l’ actu políticu, partiran en manifestación fasta’l Parllamentu Asturianu na cai Fruela, p’amestase a la manifestación soberanista convocada esi mesmu día a les 13 hores.

Con esti actu, Andecha Astur quier desixir la soberanía que "mos correspuende comu Pueblu, que mos permita ser los auténticos protagonistes del nuesu presente y futuru", y el socialismu comu "referente d’igualdá social y progresu".

Consideren qu'esti Día de la Nación Asturiana tien de ser necesariamente una xornada de reivindicación na que "los asturianos y asturianes manifestemos la nuesa voluntá de superar l’actual marcu socio-políticu col que l’Estáu español mos conderga al asimilacionismu cultural, la precariedá llaboral, la emigración forciada de la mocedá, y n’últimu términu al esfarrapamientu del texíu socioeconómicu y políticu asturianu y l’esanicie de la nuesa identidá comu Pueblu". Dende AA quieren facer un llamamientu al conxuntu de la sociedá asturiana a movilizase y a facer pública "la so voluntá de lluchar por un futuru meyor, nel que los asturianos y asturianes seyamos los auténticos protagonistes de la nuesa hestoria, recuperando la Soberanía que mos correspuende y avanzando haza una sociedá de xusticia social ya igualdá".

Andecha Astur quier  pa esti Día de la Nación Asturiana una convocatoria nacional, reivindicativa y xunitaria, a la escontra d'otres organizaciones que pretenden faer una xornada de folixa ensín más.