Andecha Astur anuncia que nun va presentase a les Estatales del 20-A

|

Nun habrá opción nacionalista nesta convocatoria d'eleiciones.

“Nestos intres hai que priorizar la dinámica asturiana y facer por aniciar un procesu constituyente nel nuesu país”, apunta'l secretariu xeneral d'Andecha Astur, Arturu Xosé Bermeyu énte la decisión tomada pola organización. Los nacionalistes atalanten "que la coyuntura política española plantega estes eleiciones en clave continuista d’enfrentamientu a los procesos  constituyentes qu’agora mesmo avancen especialmente en Cataluña" y pretenden "alliniase asina con esos procesos constituyentes, dende la reconocencia de la especificidá del mesmu nel nuesu país".

La intención de la formación ye "centrar los esfuercios en reforciar la dinámica asturiana y poner los encontos pa qu’esi procesu seya vidable n’Asturies, en cuentes de marafundialos nestes eleiciones estatales". Esta decisión coincide col 25 aniversariu del nacimientu de la formación, polo que Bermeyu considera qu'ésti ye "un bon momentu pa facer repasu y planificar el futuru”.

L'ausencia d'Andecha Astur nes Estatales del 20 d'avientu dexaría ensin opción nacionalista dafechu al votante nestes eleiciones. El plazu pa presentar candidatures ábrese mañana y va zarrase'l llunes. El día 18 van espublizase nel BOE les formaciones que se presenten.

Conceyu Nacional el día 21

Andecha Astur va celebrar el so Conceyu Nacional el sábadu 21 cola intención de que l'alderique internu que se ta produciendo na organización, según apunta Bermeyu, sía treslladáu al restu de la sociedá asturiana tres la celebración del mesmu, "nuna dinámica participativa dafechu que permita afayar el discursu y les formes a la rialidá social", destaquen dende la formación.

Contador Estadistiques