Analís del Festival

Con una pequeña distancia en tiempu y espaciu podemos intentar
facer un analís de lo que foi esta edición del Festival
Intercélticu de Lorient.



Dempués de renunciar Escocia y Irlanda a ser los países
invitaos d'honor esti añu, Asturies asumió esa
responsabilidá de la mano del delegáu p'Asturies del Festival
Lisardo Lombardía. Había muncha espectación de qué
delegación representaría a Asturies, porque tol mundu
tenía claro qu'esti añu tenía que ser el qu'afitara a
Asturies como una nación nel Intercélticu. Pa ello
preparóse una delegación enorme con 250 persones, que
xuntó a músicos, baillaores, dibuxantes, escritores, periodistes,
representación institucional...etc. Como comentó'l propiu Lisardo
durante la presentación de la delegación, esta pue que seya la
mayor y meyor embaxada que nunca nun salió d'Asturies.



El resultáu qu'algamó esta representación pue y
debe dicíse que ye satisfatoriu. La calidá de la mesma nun
quedó en dulda casi nunca, colo que los asturianos que tábemos
ellí pudimos ver una amuesa digna de la nuestra cultura, en casi toles
ocasiones. La rempuesta del públicu non asturianu foi en xeneral per
bona, pero hai que señalar una detalle. Como exemplu podemos dicir que
Dixebra foi recibida con entusiasmu pol públicu. Sobre too la primer
nueche nel escenariu más grande del Festival, l'Espace Marine, onde
había polo menos más de 4.000 persones.
Dixebra
tuvo la suerte de compartir cartel con un famosu grupu bretón, Merzhin,
que tien un estilu mui asemeyáu al de los asturianu. Esti fechu
ayudó muncho a que nel conciertu hubiera una bona entrada de
públicu. Tolo contrariu paso-y a
Hevia y
Felpeyu,
qu'aparecieron solos nel cartel del conciertu, cola consiguiente poca afluencia
de públicu al conciertu. Esto da cuenta del poco nome que siguen
teniendo tovía munchos grupos asturianos fuera del país, lo que
ye una verdadera pena porque los bretones que tienen la oportunidá de
ver a un grupu asturianu suelen primero sorpréndise de la calidá,
y depués conecten rápidamente cola so música.



Foi perbona tamién l'actuación de les bandes de gaites,
Tabladar
y La
Raitana, y de l'agrupación
Vezos
Astures. Destaca sobre too la profesionalidá de Vezos Astures, qu'a
pesar de sufrir les altes temperatures y l'agotamientu del trabayu continuo,
mantuvieron un bon nivel nes sos actuaciones. Tamién hai
qu'alcordáse del segundu puestu de les secciones de percusión de
Tabladar y la Raitana nel campeonatu de secciones de percusión. Si hai
que comentar que ye una pena que nes nueches máxiques la
delegación asturiana, representada nesti eventu poles bandes de gaites y
el grupu de baille, nun pueda salir sola y tenga que facelo xunto a una banda
de gaites gallega.



Per otru llau'l calor que fizo nesta edición punxo de relieve un
problema que vien repitiéndose dende va munchos años. Esti ye'l
gran númberu d'actuaciones que tienen que facer munchos de los
participantes, dalgunes en condiciones inaceptables. Esti problema foi
especialmente acusáu nos grupos de baille que nun paren de baillar en
tol Festival, lo que llevó a munchos a miembros de les agrupaciones a
sufrir un agotamientu, que fizo a dalgunos a tener pequeños problemes de
salú.



No que cinca a la representación institucional en xeneral hai que
dicir que desaprovéchase esti Festival como posibilidá de
promoción p'Asturies. La carpa d'Asturies nun ta a l'altura de la
importancia del Festival. Namás qu'unes esposiciones d'artesanía
y gastronomía, y unes pequeñes muestres de les posibilidaes
turístiques del país nun paecen suficiente pa tener una
representación digna nesti Festival, ún de los más
importantes d'Europa. De la mesma manera la conseyera de cultura Ana Rosa
Migoya nun foi una persona que s'involucrara muncho como representante
d'Asturies en Lorient. La so presencia nel Festival foi curtia en tiempu y
espaciu, dexando como tarxeta de visita un discursu que munches vegaes fizo
duldar sobre a que llugar taba representando polo llonxano a la realidá
del mesmo.



Como yá comentamos nuna de les noticies d'esti especial,
echóse en falta tamién la presencia del asturianu na
representación asturiana. Namás que fexo referencia al asturianu,
nel campu institucional, el conseyeru de Xusticia, Seguridá
Pública y Rellaciones Esteriores Francisco Javier García
Valledor. Hai qu'agradecer tamién a los responsables de la
sidrería asturiana que si tuvieran la bona idea d'usar l'asturianu nel
local.



Nun solo l'asturianu quedó arrequexáu nesta
edición, el bretón nun tien presencia na papelería del
Festival nin na cartelería. Esti Festival que debería ser
más sensible pa coles cultures minorizaes, y tien una asignatura
pendiente nesti sen. Si hai que dicir que ye un Festival que cuida muncho les
cuestiones organizatives, asina como tamién vixila muncho la
seguridá nes instalaciones del mesmu. Si pue criticase l'altu preciu de
les entraes pa munches de les actividaes, que fai que nun seya un modelu de
Festival popular.



En conclusión podemos dicir qu'Asturies tuvo una
representación en Lorient de calidá y que tocó munchos
aspectos de la cultura asturiana. Qu'esti Festival ye una oportunidá
p'amosar la producción cultural asturiana irrenunciable, pero qu'inda
queden munchos detalles que meyorar tantu dende la delegación asturiana
como dende la organización del Festival Intercélticu más
famosu del mundu.



A mou de posdata, Asturies.com quier informar a los sos llectores
qu'esti especial nun termina con esti resume, si non que nes próximes
selmanes va poder vese nél álbumes de semeyes que van danos una
imaxe gráfica del Festival en distintos aspectos del mesmu.