Anabel Santiago y Héctor Braga actúen esti vienres en Villaviciosa

La Casina de la Oliva, Centru del Románicu de Villaviciosa, va acoyer un conciertu d’Anabel Santiago y Héctor Braga esti vienres. Mentes, esi mesmu día, Tina Gutiérrez va actuar na sala xixonesa Acapulco.
 
La Fundación José Cardín Fernández entama’l conciertu d’Anabel Santiago y el cantante y músicu Héctor Braga dientro de la programación del so ciclu ‘Verano cultural 2011’. El dúu asturianu va llevar a La Casina de la Oliva, a partir de les 20 hores, música tradicional del país en forma d’asturianaes, coples y cantares de too tipu. Una oportunidá perfecta pa ver n’aición a dos cantantes de tonada d’escepción. La entrada pa presenciar esti espectáculu ye llibre hasta completar l’aforu. Otra manera, Santiago y Braga van repetir actuación mañana, a les 17 hores, en Tiuya, y a les 23.30 hores en La Teyerona, Mieres.
 
Esti vienres va haber otra actuación destacada, la de Tina Gutiérrez, cantante que se mueve ente la música popular asturiana, la llírica y la canción melódica. Gutiérrez va actuar a partir de les 21 hores nuna de les meyores sales qu’hai anguaño n’Asturies, l’Acapulco de Xixón. La entrada pal conciertu ye de 10 euros.