Anabel Santiago cánta-y a Diamantina Rodríguez

La voz más moza de la canción asturiana presenta esti fin de selmana'l so nuevu discu nel que la cantante casina fai un homenaxe a Diamantina Rodríguez, voz histórica de la tonada y tamién nel so día, lo mesmo qu'Anabel, tresgresora de cánones y plantiyes.


"Anabel Santiago canta a Diamantina Rodríguez" ye'l títulu del discu qu'asoleya la etiqueta Malespulgues Records y que se presenta esti martes día 13 na FNAC del Centru Comercial Parque Principado, un día intensivu de presentación pa la cantante, que va tar esi mesmu día a la 1 nos micrófonos de Radio vetusta. Nesti nuevu CD, Anabel canta los temes que nel so día ficieren popular el nome de Diamantina Rodríguez ente los aficionaos al xéneru de la canción asturiana. Con too y con ello, Anabel Santiago lleva estos cantares a una tesitura musical distinta, con un gran protagonismu nel so trabayu de les igües y cola collaboración d'otros músicos. Cola producción de Michael Lee Wolfe, el discu afonda tamién na llinia abierta xunto con otros artistes de fusión ente la tradición asturiana y el jazz gracies a l'aportación de músicos como'l pianista Jacobo de Miguel. L'artista reconoz na presentación del discu que "Diamantina ye un referente y la cantante de tonada más renovadora dientro d'una tonada perteneciente a otra época más clásica. Aspiro a ser tan subersiva como lo foi ella nel so día."

Amás del pianu de Jacobo de Miguel, per esti discu apaecen tamién les collaboraciones de la curdión de María Álvarez, les percusiones de Manuel Cordero, el productor del discu Michael Lee Wolfe, que pon guitarra, dobro y baxu, Sergio García, coles ferideres, congues y el caxón y una sección de vientos na que participen Sara Illana (flauta y pícolo) y la tuba de Pablo Merino. Na producción, amás de Lee Wolfe y la mesma artista, contóse cola collaboración d'Ismael Arias, mientres que la grabación del trabayu féxose estos dos meses de setiembre y ochobre nos estudios "Tutu" de Corvera.