Ana Rosa Migoya quíta-y valor a la encuesta sociollingüística de Llera Ramo

La conseyera de Cultura, Comunicación Social y Turismu Ana Rosa Migoya declaró ayeri nuna entrevista nel programa "En primera línea" de la TV local Canal 10 que güei recueye'l diariu "El Comercio" que refugaba la posibilidá de que la reforma del Estatutu d'autonomía d'Asturies reconoza na so reforma la cooficialidá de la llingua en cuantes qu'ello diba suponer "una imposición" a lo qu'amestó darréu que "na FSA trabayamos pola llibertá y pola opción de poder escoyer". La Conseyera recordó que la refuga a la oficialidá ye la postura histórica de la FSA-PSOE y aclarió qu'amás ella compártela dafechu personalmente.

Nada nuevo na postura de la conseyera nesti sentíu, pero Migoya afondó n'actualidá sobre la llingua al comentar que, anque los asturianos "sientan amor pola so cultura y llingua, eso nun quier dicir que demanden la oficialidá" una afirmación cola que-y quixo quitar pesu a les encuestes sociollingüístiques del sociólogu y director del Euskobarómetro, el tamién socialista Francisco Llera, nes que más del 65% de los encuestaos s'amosaben al favor de la oficialidá. La conseyera negó-y valor al trabayu del equipu Euskobarómetro al comentar que los resultaos qu'amuesa una encuesta "dependen de los items que s'escueyan".

Asturies.com faló sobre estes declaraciones col responsable de les dos encuestes sociollingüístiques que se lleven feches n'Asturies, el profesor Llera Ramo, quien comentó a esti mediu que la entruga sobre la oficialidá nun almite discusión al ser "un item que nun tien contaminación posible y qu'ha apaecer necesariamente nuna encuesta d'estes característiques". Llera Ramo afitó esta idega espresando que "si'l mesmu item se recueye a lo llargo de diez años en dos encuestes socilllingüístiques distintes y nes dos sal el mesmu resultáu, malamente pue falase de contaminación" colo que la crítica de la conseyera "nun ta xustificada".