Ana María Cano va continuar cuatro años más al frente de l’ALLA

El vienres celebróse n’Uviéu una Xunta Estraordinaria de l’Academia de la Llingua Asturiana (ALLA) na que se votó la presidencia de la institución. Ana María Cano resultó reelexía y va continuar cuatro años más al frente de l’ALLA.

D’esta forma, la caderalga de Filoloxía Románica va allargar la so presidencia al menos hasta los 16 años, yá qu’accedió al cargu'l 21 de mayu del 2001 relevando a Xosé Lluis García Arias. Xunto a Cano, tamién salieron reelexíos los miembros de la Xunta de Gobiernu actual: Miguel Ramos Corrada, como vicepresidente; Roberto González-Quevedo González, como secretariu; Urbano Rodríguez López, como vicesecretariu; y Carlos Lastra López, como ayalgueru.

El resultáu d’estes eleiciones dexa nidia la voluntá de continuidá ente los académicos, tornando a posar la so confianza na figura de Cano y del so equipu de trabayu. Dende la creación de l'ALLA, nel 1980, la institución académica namái contó con dos presidentes: García Arias y la propia Cano.