Ana Cano propón una oficialidá “que garantice derechos civiles y nun imponga obligaciones”

La presidenta de l’Academia de la Llingua tornó a reclamar otra vuelta la oficialidá del asturianu nel so discursu institucional del Día de les Lletres Asturianes. Alredor d’un millar de persones participaron na manifestación previa pa pidir la oficialidá.
 
La convocatoria fecha pola Xunta pola Defensa de la Llingua Asturiana a les 19.30 hores na Estación del Norte d’Uviéu baxo’l lema ‘¡L’asturianu, oficial! ¡Da-y al play, movilízate!, que paecía que diba tar amenazada otru añu pola lluvia, axuntó nesta ocasión a unes mil persones. Ente elles namái pudieron vese dos diputaos de la Xunta Xeneral, Roberto Colunga (Bloque por Asturies) y Noemí Martín (Izquierda Xunida-Los Verdes d’Asturies). Les formaciones presentes con pancarta foron Izquierda Xunida-Los Verdes d’Asturies; Unión URAS-PAS, que pidió’l votu pa les eleiciones nun baberu nel que taba Xuan Xosé Sánchez Vicente; Bloque por Asturies-UNA; Conceyu Abiertu y el Partíu Comunista de los Pueblos d’España (PCPE). Tamién tuvieron presentes los sindicatos Comisiones Obreres (CC OO), Suatea y CSI Mocedá, amás d’una pancarta que pedía la oficialidá pal gallego-asturiano col lema ‘¡Oficialidá xa!’ y la de los coleutivos organizadores.
 
La marcha abrióla una banderona d'Asturies, siguida d'un grupu de pandereteres que marcharon al son del so cantar a favor de la llingua asturiana. A la llegada al Teatru Campoamor, Paula Cristóbal, de Xunta Moza, lleó un discursu reivindicativu nel que criticó la política llingüística del Gobiernu d’Asturies, calificó de “tiempo perdidu” la llexislatura última y reclamó la oficialidá del asturianu pa la próxima.
 
La intervención terminó col tiempu xustu pa qu’una bona parte de los manifestantes tomaran asientu nel Teatru Xovellanos pa presenciar l’actu académicu. Ente los presentes pudo vese a Antonio Trevín, delegáu del Gobiernu estatal n’Asturies, que taba acompañáu por María Jesús Álvarez, presidenta de la Xunta Xeneral. Sonia Avellaneda y Próspero Morán foron los encargaos de presentar l’actu, qu’abrió cola tonada de José Manuel Collado y la gaita d’Óscar Fernández González. De siguío, entamó la xunta estraordinaria de l’Academia de la Llingua Asturiana (ALLA), nel que se proclamó a José Ramón Morala Rodríguez como académicu d’honor. Tamién recibió un reconocimientu’l ex ciclista profesional José Luis Rubiera Vigil, más conocíu como Chechu Rubiera, qu’arrancó los aplausos del públicu con un discursu divertíu y sinceru nel que defendió la llingua asturiana como instrumentu de comunicación.
 
Pela so parte, Ana María Cano, presidenta de l’ALLA, recordó la actividá de l’Academia nel añu últimu enantes de destacar “la trescendencia (social, económica y cultural) que pal futuru d’Asturies tienen estes eleiciones”. Cano aseguró que la institución que dirixe ye “neutral” de cara a la cita coles urnes y que lo que quier ye “lo meyor p’Asturies, sobro too nel tarrén cultural”. La presidenta alertó de la situación de pelligru de desapaición que tien el nuesu idioma y aprovechó la ocasión pa reclamar, otra vuelta, la oficialidá de la llingua: “L’ALLA comprométese a ayudar na busca d’una fórmula xurídica d’oficialización del asturianu, asumible por tolos partíos que s’asitien na Xunta Xeneral, que garantice derechos civiles y nun imponga obligaciones a los que nun quieran exercelos, pero que sí los garantice —repito— a los que también mos pruya exercelos en llibertá; oficialización qu’ha ser asinamesmo razonable dende’l puntu de vista económicu y planificada y gradual na so puesta en práutica”. Tres la so intervención y los aplausos del públicu, un grupu de militantes entamó a glayar ‘Oficialidá’ –grito que siguió tol teatru– con pancartes onde podía lleese ‘Oficialidá’ y ‘Democracia’ a l’altura onte taben presenciando l’actu Trevín y Álvarez.
 
Pa finar, Avellaneda y Morán lleeron dellos poemes y el grupu Xera fixo una intervención musical. L’himnu d’Asturies sirvió de pieslle al actu académicu.