Amplia asistencia a la presentación de la plataforma pola oficialidá

La Xunta Pola Defensa de la Llingua fizo ayeri l'actu públicu de presentación de la plataforma abierta cola que la organización cívica quier llegar a un consensu ampliu pa que la oficialidá del asturianu se reconoza abiertamente na próxima reforma del Estatutu d'Autonomía d'Asturies, que güei dio tamién los sos primeros pasos col alcuerdu de la Xunta de Gobiernu d'encargar estudios a especialistes sobre les posibles reformes nel testu estatutariu.

Al actu, qu'enllenó'l salón d'Actos del Auditoriu Príncipe Felipe d'Uviéu, acudieron representantes d'organizaciones y partíos políticos de tol espectru social y ideolóxicu asturianu, amás de persones a títulu particular. Anque l'actu d'ayeri namás foi una presentación de la plataforma, y va haber que ver d'agora en p'alantre como se desarrolla'l llabor de la mesma, a la convocatoria d'ayeri respondieron, ente otres organizaciones, los partíos políticos d'ámbitu asturianu como Partíu Asturianista, Bloque por Asturies, Izquierda Asturiana o Andecha Astur y tamién fuerces d'ámbitu estatal como Izquierda Xunida y el Partíu Popular. L'ámbitu sindical contó cola representación d'UXT y Corriente Sindical d'Izquierdes, mientres qu'otros movimientos tamién tuvieron una representación bien curiosa, casu del ecoloxista - Coleutivu Ecoloxista d'Avilés, Coordinadora Ecoloxista d'Asturies, Amigos de la Naturaleza Asturiana- o les agrupaciones musicales - Trebolgu, Escuela de Música tradicional la Quintana de Xixón- . El feminismu tamién tuvo representación, cola participación del Grupu de moces Males y Perverses y el Coleutivu Milenta Muyeres, mientres que'l movimientu de defensa y estudiu de la llingua contó con participaciones como la del Coleutivu Manuel Fernández de Castro, Xeira o la Fundación Caveda y Nava.

Anque'l llabor de la plataforma y los sos integrantes definitivos tan por conocese a lo llargo de nueves sesiones de trabayu, de momentu la iniciativa yá tien nome: Conceyu Abiertu Pola Oficialidá, una denominación que la Xunta entiende qu'espeya'l calter ampliu de la convocatoria y l'únicu puntu de consensu que tienen de compartir tolos sos integrantes