'Amosando' xube'l conciertu d'Ún de Grao

El ciclu va grabar actuaciones d'Anabel Santiago y Eva Tejedor & Les Pandereteres.

Yá ta disponible na rede'l conciertu d'Ún de Grao en 'Amosando', la iniciativa de Musicasturiana pa dar a conocer les producciones discográfiques nueves de los artistes y grupos del país per tol planeta gracies a Internet. José Martínez Álvarez, que va tocar esta tarde a les 19.30 hores nel Centru Municipal Integráu de L'Arena dientro del ciclu xixonés Alcuentros de Músiques Asturianes, lleva dalgunos de los sos cantares de 'Pelo segao', el so primer LP, como 'Adiós llugarín de Pión', 'Quítate neña' o 'Nun llores nin'.

Ún de Grao grabó en setiembre xunto con D'Urria esta actuación, pendiente d'espublizar, que va acompañáu d'una entrevista. Mañana va tener llugar una sesión nueva d'estos conciertos de formatu íntimu nel estudiu de Javier Lueje en Xixón, nesti casu con Anabel Santiago, colos temes de 'Y_Andá', y Eva Tejedor & Les Pandereteres, colos del so primer discu 'L'entamu'.