Amosando emite toles selmanes una pieza de les sos actuaciones

Esti ciclu acoyó en dos años un total de 12 conciertos, de los que recupera cantares los domingos a la espera de que se dean les condiciones pa programar la edición del 2021.

Musicasturiana creó nel 2019 Amosando, iniciativa consistente en grabar y emitir per Internet actuaciones con públicu nun formatu íntimu d'artistes y bandes asturianu col oxetivu de dar a conocer los sos trabayos nuevos. La pandemia de COVID-19 frenó esta actividá, polo que, a la espera d'una meyor situación epidemiolóxica pa siguir esti mesmu añu col proyeutu, los sos entamadores decidieron recuperar dalgunes pieces pa emitiles en periodicidá selmanal.

El día escoyíu ye'l domingu, a les 21.30 hores, na canal de Facebook y d'Instagram de Musicasturiana. Hasta'l momentu'l públicu pudo ver la intepretación de 'La campanona' de D'Urria, 'Ven a veme' d'Anabel Santiago y 'Rosalía', cantar de 'Bestiariu' interpretáu por David Varela y Alicia Álvarez, y n'emisiones siguientes Amosando va siguir esbillando d'actuaciones de formaciones como L-R, Xaime Martínez, Ún de Grao, Eva Tejedor & Les Pandereteres, Cerezal, Silvia Quesada, Felpeyu, Fruela 757 y Misiva, hasta sumar más de 30 pieces.

Seis grupos más

La intención d'Amosando pa esti 2021 ye la d'entamar más conciertos nes que participen otres 6 bandes, actuaciones que van siguir contando cola realización audiovisual de Javier Lueje y la producción de Goxe. Dende qu'entamó esti ciclu acumúlense más 210.000 reproducciones en 60 países, apunten dende Musicasturiana.

Na semeya, Varela y Álvarez na actuación emitida esti domingu.