Amnistía Internacional pidió n’Asturies más control sobre los videoxuegos

Na viéspora de la fiesta de Reis Magos, l'Asociación Amnistía Internacional (AI) presentó na so sé d'Uviéu l'informe "Menores y derechos humanos, responsabilidaes en xuegu" nel que denuncia lo fácil que ye pa rapacinos pequeños l'acceder a xuegos de conteníos ultraviolentos y sexistes nos que se fai de menos a los derechos humanos. Avelino Pascual Ornia, presidente de l'asamblea asturiana d'Amnistía Internacional, esixó una regulación estatal sobre estos videoxuegos que, pa ser bien, tendría de llevar arreyada una específica asturiana, criticando nesti sentíu la llei del menor del Principáu, que-y abulta "ambigua".

El mensaxe que vien col videoxuegu "Mortal Kombat" abre l'informe d'AI sobre videoxuegos violentos. Les pallabres que diz esta antoxana al xuegu nun dexen llugar a dulda sobre l'enclín violentu del entretenimientu, encamentando al xugador que venza a los sos enemigos "fundiéndolos en poces d'ácidu, espetándolos en techos con pinchos o colgándolos de ganchos". "San Andreas", otru xuegu que ta mui espardíu ente la reciella, propón una aventura que tien por entamu'l robu d'un coche a mano armada si ye preciso. AI denuncia qu'amás esti xuegu discrimina y maltrata a les muyeres y llama l'atención sobre'l peligru que supón qu'estos xuegos s'espardan ensin control nengún al traviés de redes d'internet y tamién de los teléfonos móviles.