Amnistía Internacional denuncia qu’Asturies ye la comunidá que refugó más órdenes de protección nel añu 2005

La organización Amnistía Internacional dio ayeri una rueda de prensa na que fizo un balance críticu del primer añu de funcionamientu de la Llei de Violencia de Xéneru. Amás de los problemes xenerales que se conseñen en tol estáu pa l'aplicación de la llei, AI denunciaqu'Asturies refugó'l 32% de les solicitúes d'orden de protección que presentaron muyeres victimes de supuestos maltratos, el tantu por cientu más altu del estáu.

Un añu dempués de la entrada en vigor de la Llei Orgánica de Protección Integral énte la Violencia de Xéneru, Amnistía Internacional tien conocimientu d'hasta menos 24 torgues distintes qu'alcuentren les muyeres que quieren denunciar casos de violencia de xéneru. La falta de midíes pa detectar casos de violencia nel ámbitu sanitariu, la falta d'información pa los mesmos profesionales que trabayen en contactu cola violencia de xéneru y la falta d'interés por parte del mesmu sistema xudicial p'adaptase a la llei nueva son parte d'estos problemes que tan paralizando la entrada en serviciu de la mesma.

L'informe en qu'AI fai balance de la Llei espeya como l'añu d'entrada en serviciu de la mesma foi'l peor no tocante a muyeres asesinaes dende 1999, con 37 muyeres víctimes mortales d'ataques de les sos pareyes. Anque AI empondera la Llei como un pasu importante, llamenta tamién l'aplicación tan desequilibradaquese fai d'ella nes estremaes comunidaes autónomes. Ello ye que nel 2005 73.109 muyeres presentaron en toa España solicitúes de protección p'acoyese a los beneficios de la Llei, de les que se refugaron el 22,7%, según denuncia AI, "ensin aportar xustificación neguna en munchos casos". Mirando estes cifres por Comunidaes Autónomes, resulta que mientres en Navarra l'índiz de refuga d'estes solicitúes foi del 11%, n'Asturies llegóse al 32%, el más altu del Estáu. Amnistía Internacional recuerda que la "orde de protección" ye requisitu imprescindible p'acceder a recursos básicos como les ayudes económiques, a la vivienda, o incluso a l'ayuda sicolóxica. Amás de les desigualdaes ente les estremaes comunidaes del estáu, AI denuncia que les muyeres inmigrantes tán más espuestes cola llei nueva, en cuantes que, en casu de nun consiguir orde de protección, cuerren el riesgu d'acabar con una orde d'espulsión del país.